गाझियाबाद : पोलिसांनी एका 22 वर्षीय तरुणीचा लैंगिक छळ केल्याची धक्कादायक घटना समोर आली आहे. आपल्या भावी पतीला भेटायला गेल्यावर पीडितेला या धक्कादायक अनुभवाला सामोरे जावे लागले. ही घटना 16 सप्टेंबर रोजी घडली. मुलगी गाझियाबाद मधील साई उपवान सिटी फॉरेस्टमध्ये गेली असता दोन पोलिसांनी तिचा लैंगिक छळ केला. यावेळी आणखी एक व्यक्ती उपस्थित होती. त्याने साधे कपडे घातले होते. पोलिसांच्या गाडीतून तीन जण आले. यावेळी त्यांनी दाम्पत्याकडे 10 हजार रुपयांची लाच मागितली.
तरुणीने दिलेल्या तक्रारीवरून 28 सप्टेंबर रोजी कोतवाली नगर पोलिस ठाण्यात गुन्हा दाखल करण्यात आला होता. मुलीने पोलिसांना दिलेल्या माहितीनुसार, पोलिसांनी तिच्या पतीला मारहाण केली. तसेच त्यांनी तिच्या प्रायव्हेट पार्टला चुकीच्या पद्धतीने स्पर्श केला. तसेच हा सर्व प्रकार घडल्यानंतरही आरोपी पोलीस कर्मचारी तिला फोन करत होते. तिच्या घराबाहेर येऊन तिला धमकावत होते.
तरुणीने पोलिसांच्या आपत्कालीन क्रमांकावर फोन करून संपूर्ण घटना कथन केली आणि तक्रार दाखल केली. दिल्ली पोलिसांनी हा फोन कॉल गाझियाबाद पोलिसांना पाठवला. तिन्ही आरोपी पोलिस कर्मचाऱ्यांची ओळख पटली आहे. कॉन्स्टेबल राकेश कुमार, होमगार्ड दिगंबर अशी दोघांची नावे आहेत. याशिवाय आणखी एका अनोळखी व्यक्तीचा यात समावेश आहे. पीडितेने दिलेल्या माहितीनुसार, तिला आणि तिच्या भावी पतीला आरोपी पोलिसांनी पकडून ठेवले होते. तीन तास ते तिच्यावर अत्याचार करत होते. पोलीस अत्याचार करत असताना या दाम्पत्याने आरोपींना 1000 रुपयेही दिले.
दुपारी 12 वाजण्याच्या सुमारास पीआरव्हीमधून तीन जण आले आणि आम्हाला धमकावू लागले. त्यांनी माझ्या नवऱ्याच्या कानाखाली चापट मारली. त्यांच्यापैकी एकाने माझ्याकडे 10,000 रुपये मागितले. आम्ही त्याच्यासमोर हात जोडले. आम्हीही त्याच्या पाया पडलो. पण त्याने ऐकले नाही. यानंतर राकेश कुमार खूप वाईट वागू लागला. तो मला शारीरिक संबंध ठेवण्यासाठी जबरदस्ती करू लागला. तिसऱ्या व्यक्तीनेही आमच्याकडे साडेपाच लाखांची मागणी केली. आम्ही तीन तास त्यांच्या ताब्यात होतो. यावेळी आरोपींनी वारंवार मला अयोग्य पद्धतीने स्पर्श केला, असे पीडितेने पोलिसांना सांगितले.
मुलीने दाखल केलेल्या तक्रारीच्या आधारे, पोलिसांनी तीन आरोपींवर कलम 354A (1)(ii) लैंगिक छळ आणि लैंगिक इच्छा प्रवृत्त करणे, 323 (स्वैच्छिकपणे दुखापत करणे), 504 (हेतूपूर्वक अपमान) आणि 342 (चुकीच्या पद्धतीने बंदिवासात ठेवणे) या कलमांखाली गुन्हा दाखल केला आहे.) गाझियाबादच्या सहाय्यक पोलिस आयुक्तांनी दिलेल्या माहितीनुसार, या घटनेनंतर राकेश कुमार यांना निलंबित करण्यात आले आहे. कारवाईसाठी दिगंबर विभागाला पत्रही पाठवले आहे. तिन्ही आरोपी सध्या फरार आहेत.
